X.M.M.Mioduszewski (http://spiewnik.katolicy.net/index.php/topic,353.0.html)
Inclytum regni columen poloni,
Magne Doctorum Pater alme Canti:
Lechicos inter radians Patronos,
Posce tonantem.
Solis ut claros rotat orbis ignes,
Sic micat nostro tua lux in Orbe:
Noctis ut Princeps superat minores,
Cynthia flammas.
Grande virtutum teneris ab annis
Te jubar cinxit, niveique dotes
Pectoris, devotaque mens profundo
Numine mersa.
Regiæ magni Jagelonis aulæ,
Diva quam Pallas, Cracidos beatis
Incolit tectis, lapis angularis,
Atque columna es.
Te Sophum mitræ, viridesque laurus,
Quas tuæ fronti nive consecrasti,
Prædicant unum: tibi de tuoque
Munere vivunt.
Terna te laurus triplici coronans
Fronde, mortali positum sub umbra,
Jam perennatis beat ut sitisti,
Pignore laudis.
Arte cœlesti, probitatis in te
Norma formata est, voluitque pingi
In tuo primum speculo, togatæ
Regula vitæ.
Asperi carnem domuere cultus,
Cor tibi flammis amor ussit ingens:
Divitis prædæ data vestis instar
Cessit et esca.
Sæpius vestes tullit indigentum
Nuditas, quæ cor tibi lancinabat;
Quo tegis nudum, tibi Christus ipse
Reddit amictum.
Virginum Virgo, tibi destinatum
Contulit vitæ decus innocentis;
Dum tibi casta posuit virentem
Fronte coronam.
Addidit pennas tibi vis amoris,
Ad viam Sacri properans Sepulchri;
Æstuans, longe positas salutis
Curris ad undas.
Dulcis est visus tibi sudor omnis,
Arctius qui te superis ligabat;
Viluit mundi comitala multo
Felle voluptas.
Noctium sacras vigilesque curas,
Flammeus cordis superabat ardor:
Tanta de cœlo tibi gratiarum
Copia fluxit.
Hinc tibi sensus humiles, placentque
Ima contemptus, tumidusque sæcli
Vincitur fastus, pede mortis atra
Colla premente.
Bethleem dum sol oritur tenellus,
Occidis sydus Lechiæ coruscum:
Fasciis carum tenuit Joannem
Te Deus infans.
Sic vetus transit rigor in beatæ
Gaudium vitæ, grave sed relictis
Vulnus hæsisset, nisi sacra nobis
Busta dedisses.
Mira queis grati data vis odoris,
Et solum late reficit Polumque,
Ad tuos dum tot cineres stupenda
Computat acta.
Vota quot plebis pia tot fatentur,
Luxque cis Sacrum tumulum perennis,
Quam preces semper venias petentum
Pronus ad omnes.
Ergo Lechei diadema Regni
Protege, et summos Pater alme fasces:
Regia nam te, posuit Patronum
Numen in urbe.
Vindices iras solii tremendi
Tolle placando: dabit hoc petenti
Summa majestas, redeatque cœlo
Pax bona per te.
Cracii Musis faveas Lycæi,
Magnus in Regno Lechiæ Patronus;
In tuo natos gremio, parentum
Optime serva.
Mentium lumen, sapientiæque
Impetra nobis jubar, ut beato
Lucis æternæ potiamur omnes
Te duce Regno.
Polska wersja hymnu tutaj: http://spiewnik.katolicy.net/index.php/topic,1214.0.html